الأسبوع الماضي و الأسبوع هذا مرت أشياء كنت لازم أكتب عنها بس للأسف أني ما قدرت أكتب. بتقولون ليش؟ بقول لكم كسل. المهم رح أبدأ أكتب بالمواقف الي صارت لي من الأسبوع الماضي لين هذا الأسبوع بس للأسف أني نسيت نصها المفروض كنت أدون عشاني صرت أنسى بدرجة فضيعة بس رح أكتب أهمها.
الأسبوع الماضي من17-21 نوفمبر
1.وصلت المدرسة كعادتي متأخرة وفتحت اللوكر وحطيت الجاكيت والسكارف سكرت اللوكر ورحت الصف. قعد على الكرسي الي دايماً أقعد علية والأستاذ قال أنه رح ينطر خمس دقايق لين ما كل الطلبة يوصلون. فتحت الشنطة وطلعت الكتاب الي لازم نقرأة ونخلصة وبدأت أقراءة. الهدوء كان يعم الصف، فجأة بنت قالت بصوت عالي، الكل ألتفت لها، طبعا بالإنجليزي بس أنتوا ترجموا ههه بس عشان تتخيلون المنظر صح ههه” ياربي اليوم هذيك البنت الي ما تيجي إلا في الشهر مرة كانت واايد خايفة أنها تدخل النار لمن قعدت عند البنت المتدينة الي دايماً تقراء الإنجيل “البايبل” وتسمع البابا شيقول قالت البنت لها أن بعد الموت في حياة وفي جنة ونار وإذا ما تروحين الكنيسة ربي ما بيحبك وترا لو تبين صج تدخلين الجنة مافي مزاح مع الشباب لازم أتكونين صادقة وتعرفين شو لازم أتسوين وأتصلين بعد هذا أهم شي”. بعدين قالت أن البنت أن البنت الخايفة طلبت منها أنها تيجي معاها الكنيسة فقالت أنها مسلمة ما تقدر أتروح بعدين قالت البنت المسيحية عادي بس تعالي معاي أسمعي مارح يصير شي بس أنا خااااايفة ما أبي أدخل النار مابي.
جلست شوية أشوف البنت وأقول في داخلي وين أم أو أبو هالبنت ليش ما علموها عن دينهم يعني معقولة ما كانت تعرف أن في جنة ونار بعد الموت. فقلت الحمدلله على نعمة الإسلام وأنا ربي رزقني بأهل يتكلمون واايد عن الإسلام وشو الصح وشو الغلط وأنه في عقاب بعد الموت… الحمدلله ألف مليووووووووووووون مرة.
2.كنت أنا وربيعتي ناكل غدانا في الفسحة12:41 الظهر تقريباً.كنا نتكلم عن واايد أشياء. سكتنا شوي وفجأة قالتي أنتي تصدقين المثل الي يقول “One hand can’t Clap” قلت لها أكيد يعني شي طبيعي. بعدين قالت أمي دايماً أتقول هالعبارة بس بعدين ماصرت أصدقها وأقول لها اليد الوحدة تقدر أتصفق قلت لها “Prove it “. أول شي قالت بالجدار بعدين ضحكت وقالت “تراني أمزح لا بس البارحة شفت في موسوعة جينيس للأرقام القياسية واحد يصفق بيد وحدة.”
أول شي أستغرب بس بعدين صدقت لأن كل شي يصير في هالدنيا. وهذا رابط للفيديو في اليو تيوب بس مو مال الي دخل موسوعة جينيس هذا حق واحد عادي. إذا سويتوا بحث بتلاقون واايد.
الأسبوع هذا من24-اليوم من نوفمبر
1.في صف الفلم والفيديو ،وبعد ما خلصت الأبلة شرح كيف يسون الأفلام الوثائقية “دوكيومينتري” طلبت منا أنا نسوي فلم وثائقي عن أي شي نبية والأفضل أنا نختار قروب كبير عشان نستخدم كميرتين لتصور فأنا والبنت الي جنبي دايما نشتغل مع بعض قلنا رح أنكون مع بعض فقعدنا قدام الكمبيوترات أنفكر ولافين إيدينا فجو بنتين ثانيات وطلبوا من البنت الي رح تشتغل معاي أنهم ينظمون لنا فالبنت سألتني، وأنا ما أحب أقول لاء فقلت أوكي،” نكون مع بعض يمكن يسهل الشغل” وكانت عندهم فكرة حلوة أن نصور حياة الأساتذة والأبلوات في وقت فراغهم فقلت فكرة حلوة ونحن بس عندنا أسوبع واحد لتصوير يعني مافي وقت فقررنا في هذاك اليوم من هم الأساتذة والأبلوات رح يكونون ونبدأ التصور الكل كان متحمس للفكرة وحتى أنا الصرااحة بدينا نرسم “الستوري بورد” . في اليوم الثاني ونفس الصف أجتمعنا عشان نكمل الشغل الي أصلاً ما بديناه فالكل بدأ يقول الفكرة صعبة ومارح نخلصها في أسبوع وقعدنا نتكلم لين ما دق الجرس وضاع اليوم الثاني من الكلام الفاضي واليوم قعدوا يقولن ما رح أنخلصة قلت لهم إذا بدينا رح أنخلص لازم أنروح ونسأل الأساتذة متى وقت فراغهم عشان أنصورهم… بس محد راضي يفهم يعني “دق على الماي وهو ماي”.فقرروا يغيرون الفكرة والصراحة يعني بديت أعصب يعني الفكرة حلوة ويا زينها وبعدين يغيرون الفكرة وبعد خلاص سألنا الاساتذة يعني مو حلوة .
ياربي ما أدري ليش ما يفهموني يعني صرت أكرة أشتغل في فريق، أفضل أشتغل بروحي عن الشغل مع شخص ثاني يمكن عشانهم ما يفكرون تفكيري يمكن عشانهم أجانب ومو متعودة على أفكارهم الفننننتك. الله وعلم بس أتعلمت درس أن فريق أكثر من شخصين في بروجيكت صغير ماينفع.
2.أمس كنت قاعدة أشوف القنوات. القنوات هالأيام صارت مملة بذات إذا كنت عايشة في دولة الوقت فيها عكس الدول العربية. بس بعدين وقفت عند قناة الشارقة كنت أشوف الدعاية مالت سيدار. سيدار دخلت موسوعة جينيس للأرقام القباسية لخياطتهم أكبر علم في العالم وكان هذاك العلم علم الإمارات أستانست واايد والله.
بس ما عرفت أبارك للإمارات ولا لسيدار . على العموم مبارك ياسيدار الإمارات وكل عام والإمارات بخير مقدماً بعيد الإتحاد.
