بعد الإمتحانات

اليوم بدأت أول إمتحان وهو اللغة الإنجليزية
وغدا سأكمل باقي الإمتحانات
سأترك المدونة لفترة قصيرة جداً وسأعود بإذن الله…
دعواتكم لي بالتوفيق…

يوم تطوعي

في أبريل 21 صار إحتفال كبير فالمدرسة عن الفن الجنوب الشرقي. من الساعة 4:30 لين الساعة 8:30. مدارس كثيرة شاركت بالأحتفال ومعضمها مدارس إبتدائية وإعدادية عرضت أعمالها  وشاركت بالرقصات. كان ودي أتمعن بالصور والرسومات والأعمال أكثر مع أنه أعمالهم بسيطة ومعظمها رسومات أطفال بس كان لها نكه خاصة. تطوعت في صف الكتاب السنوي إني أصور الإحتفال. وتطوعت إيضاً  في إرشاد الأساتذة والطلبة الي يجون من مدارس ثانية. صارت أحداث كثيرة بس ما بطول عليكم شوفوا الصور.

صورتصور كثيرة بس هذي أحلاها بكيميرة المدرسة هي كيميرة نايكون.

قبل ما يبدأ العرض كانا نخلي الأهالي يروحون الكافتيريا عشان يقعدون وياكلون لين ما يبدا العرض.

هذي أحد المدارس الصناعية الي شاركت بالطبخ مثل ما تشوفون بس للأسف طبخوا بالبيرة عشان كذا ما أقدر أقول لكم كيف كان الطعم. لأني ما كليت!

المعرض: هذا المعرض الي شاركوا فيه معضم المدارس. وكان مقره بصالة الرياضة.

مع أني ما شفت كل الرسومات بس رسمة الوردة الحمرا عجبتني كثير مادري ليش يمكن عشان لونها بارز . كانت ملونة بالـoil pastel.

الصورة الي تحت شاركت فيها مدرسة أخواتي الصغار. الي فوق ما أعرف أي مدرسة بس كمان إبتدائية. هو عبارة عن مدينة بس بالأشياء الي يعاد تصنيعها مثل الأوراق الكرتون وقوارير الماي.

لا تعليق

هذا كورنر مدرستنا يعني صراحة مو أسوأ كورنر. بس مافي أعمال كثيرة و معضمها مال صف التاسع.

بما أني كنت مرشدة  وأنا أرشد بعض من الأساتذة أجت أبلة ومعاها يمكن 30 طالب تقريباً من الصف الأول عشان يعرضون رقصة في  نهاية اليوم. أول شي كانت تحسب الطلبة عشان تتأكد من العدد طلع في طالبين ضايعين الحرمة بغت تبكي. جابوا مديرة مدرستنا و بعض من الحضور الكبار. بعد ما خلصت تعد الطلبة طلع 4 طلبة ضايعين الأبلة تجننت راحت تشوف تدور مالقت بعدين لمن رحت سمعت الإعلان بس فالنهاية قالوا خلاص حصلوا الطلبة… أضن بالباص.

في نهاية الحفلة جت أم تسألني عن رقم الصف فقلت لها، شوي و ترجع ثاني مرة تقول لي أبني من مدرسة كذا وهو بصف كذا (نسيت ما أذكر بس كبير يعني سادس كذا شي ) ومالقيته بالصف. وديتها عند الأبلة المسؤلة قالت لها أنتظري يمكن ماطلع من القاعة. الحرمة تخبلت، وقعدت تدور  رايحة راجعة من القاعة للصف لمن خلصت الحفلة الأبلة أتقول أتصلي بأبلته يمكن تعرف وينه. طلع الأبلة رجعت الطلبة مدرستهم والولد رجع البيت والأم المسكينة  تدور عليه ساعة.

مزكمة+ تعبانة= مريضة

أعذروني ع القطيعة…. مريضة وواجبات هالكتني والشهادة رح تجي الأسبوع هذا. ودي أدون كثير أشياء وأولهم ألبومي الثالث لين ألحين ما سويته.

أحس أني مريضة…. بعد ويك أند طويل. بدأت الإجازة من يوم الجمعة ورح تخلص يوم الثلاثاء يعني بكره. البيت كله مرض من أسبوع إلا أنا يوم بتخلص الإجازة مرضت وعندي واجبابت متراااكمة ع الأخير والله ما أدري متى بخلصهم والمشكلة أنه يوم الثلاثاء أخر يوم لتسليم.

الصورة توني مصورتها من دون إضافات. أضغطوا ع الصورة عشان تشوفونها بالفلكر.

أعطوني رايكم بالصورة

ودي أطير

ودي أطير من الفرحة… الحمد لله والله يديمها

اليوم الأخبار الحلوة كلها جات مرة وحدة مبارك ع الفوز… ومبارك ع البيبي وجعلها من الذرية الصالحة يارب.

ألحين جا الخبر المهم أتأهلت لنهائي للمسابقة الي أشتركت فيها… الموضوع هنا

ما أدري كيف أوصف أحساسي، لمن سمعت الخبر صعقت كنت محتاجة صفعة أو قرصة تفوقني من الحلم، رجعت البيت ما صدقت الخبر أتأكدت من الموقع وكان أسمي مكتوب، بشرت الكل وبعدين أتصلت بأخوي أبشره.

شكراً لكل من دعالي ووقف جنبي وحفزني، شكراً من القلب. شكراً لكم.

* صممت خلفية لسطح مكتبي أضغطوا على الصورةفي الأعلى  لترى التصميم

إحساس

في مره حسيتوا بإحساس غريب ما عرفتو كيف توصفونه؟؟
في مره حسيتوا بأن أحساسكم تداخل بعضة وصار أحساس غريب؟؟؟
في مره حبيتوا تفضفضون أحاسيسكم ويطلع أنكم قلتو نفس الأحساس لنفس الشخص أكثر من مرة؟

أحياناً أقول
أنا أحس …. وأنتي تحسين كذا؟؟
تقول لي أحياناً أحس بس ما أقدر أوصف أحساسي يعني…
أحساسي عبارة عن كتلة ما أقدر أسميها أو أوصفها…
مثل الفقاعة تطلع وبعدين تطير ويجي غيرها…

وأنا أرد…
أنا فقاعتي ما تطير أحسها ترجع مكانها وتنعاد…
>أنتهى <

أحاسيسي زادت هالأيام والمشكلة لمن أردد أحاسيسي بيني وبين نفسي أمِل… فلازم أشاركة مع أحد… وهالأحد لازم يطفش من هالأحاسيس الي ما تخلص… بس شاسوي؟؟؟

قائمة أحاسيسي الي دايم تتكرر.
- أحس أن الوقت يجري
يوه ألحين كانت الساعة 3 كيف صارت 6 ؟؟؟؟

- أحس أني والدة هنا.
يعني من زمان أنا عايشة هنا…

-أحس أني أبغى أسافر.
أبغى أسافر أي مكان مو مهم بس أسافر …

-أحس أني أبي أصرخ.
فيني صرخة غريبة أبغى أطلعها…

-أحس أني ما أبغى أروح المدرسة.
مافي أحد أمشي معاه، الأبلوات كلامهم كثييييييير، وجباتي متراكمة ما حليت إلا ثنين <<< الي يسمع ما يقول عندي 4 حصص. المدرسة مللللللللللل.

-أحس روحي طفلة.
أحياناً أجلس مع نفسي أقول ياربي معقولة أنا ألحين عمري… العمر مر بسرعة.

وقائمة الأحاسيس ما تخلص… بس ترا ذكرت الي دايم الدوم أردده. وصراحة مليت بس ما مليت منها. يعني ودي دايم أكررها بالذات الي أحسه بيصير…

بس لحظة لحظة أيش معنى الأحساس؟؟؟*
هل هو كتلة مشاعر متداخلة في بعضها ولا… شي في داخلنا نحس أنا نبي أنقولة… ولا شي أنحس أنه بيصير بس ماندري متى وكيف؟؟؟
سؤال كذا خطر في بالي…

* سؤالي لكم ما الفرق بين الأحساس والشعور؟؟

متضايقة

قررت أني ما أتضايق بس ما قدرت

مخنوقة ومتضايقة الناس تتمادى وأنا ما أعرف شو اقول
ويتعاملون معنا وكأنا …
الله ينتقم منهم

يوم مميز

أشتركت في مسابقة للطلبة المسلمين في مدارس أونتاريوا.عنوان المسابقة كان “Hometown Heroes: Thinking Globally Acting Locally” . الصراحة كان العنوان شوي صعب. المهم أشتركت في قسم التصوير وكانت أول تجربة لي من ناحية أني أشارك في أي مسابقة. الصراحة كانت تجربة حلوة وأكثر كمان وأستفت منها كثير يوم السبت الموافق  7 مارس كان أول يوم للمسابقة الجو كان ممطر وحلو وصورت بعض الصور للمسابقة.

هذي البوسترات الي كانت معلقة بس صورتها.

مكان التجمع. كثير ناس جو بس هذولا نصهم.

كرتي للمسابقة الي سجلني كتب أسمي وأسم عائلتي بأسمي.

هنا في غرفة قسم التصوير هذي الصورة الي شاركت فيها كنت اراجع شبقول. لأن في المقع قالوا مقابلة بس بعدين قالوا لازم أسوي  عرض تقديمي لصورة وأنا ما جهزت إلا لللأسئلة. بس الصراحة ما عرفت شاقول أرتبكت.

هذي الصور المشاركة. كان في 2 بعد بس  أصاحب الصور أخذوا الصور.

اليوم الثاني كنت المفروض أروح عشان أعرف من ربح  كان ودي أروح بس ما قدرت بس من فريقنا ربحوا 3 وتأهلوا لنهائيات ورح يروحون أمريكا  بس أنا ما أضن إني ربحت . أهم شي أني أستفدت من التجربة الروعة.

في المطبخ…

في هالشهر  مرت علي حوادث في المطبخ  الصراحة تصدع الراس…

في أسبوع الإمتحانات كان مزاجي معكر لدرجة فضيعة… ومره أمي طلبت مني أسوي كب كيك وكيك قلت أوك …ولا أقوم وأزود ماي في الكيك وأقول ياربي الكيك كأنة زايد ماي في شوية …و أنا ولا على بالي بس أكبر همي نجحت ولا لاء في الرياضيات… دخلت الكيك و الكب كيك داخل الفرن… بعد ربع ساعة أختى تناديني قلت لها خير قالت تعالي شوفي الفرن… تخيلو شو صار… T_T الكيك طفح و طلع خارج الصحن… يعني الكيك وصل للفرن من تحت… فقمت طلعت الكيكات ونظفت الفرن T_T ….

و قبل أسبوع كنت أسوي سلطة فبديت ببرش الجزر… و برشت أصبعي شوية قمت قعدت ورديت أكمل … وبرشت أصبعي زيادة الصورة الي فوق صورة أصبع يوم برشته بس الأول مو واضع والصورة الثانية صورتها أمس..

ومرة كنت جوعانة وقررت أسوي لي بطاط مهروس (ماش بتيتو )… وما ركزت أن أحد كان حاط كيس خبز شرايح… وكنت حاطه البطاط على الـ10 دقايق إلا وأشم ريحة غريبة… فتحت المايكرو ويف إلا وأشوف الكيس لصق بالمايكرو ويف طلعتة وعقيته الزبالة وأنا أقول والله حرام نحن نقط الأكل وغيرنا يتمناه المهم… تخيلو شو شفت T_T شفت أنه الصورة والكلام الي كان في الكيس ذاب وطبع في المايكروويف… ياربيييي وأنا ما أبي أمي تشوف… إلا و قمت أنظفة وبقى شوية يعني ما راح تماماً.

صدقوني كرهت المطبخ…

6 أسابيع.. وإلى اللقاء

“الشتا رح يخلص بعد 6 أسابيع” . سمعت هالعبارة من أختي أمس أستانست، لأنة الشتا هنا يضيق الخلق والله…
بس يعني … ما تهنيت بالشتا هالسنة يمكن عشان حوشنا في هالبيت صغير، بس خيرها بغيرها…

السنوات الماضية كنا نطلع الحوش ونسوي رجل الثلج ونلعب بالثلج وحركات، لكن هالسنة الكل مشغول ومحد فاضي حق حد.
أبي الصيف يجي بسرعة ومع الايام رح اقول لكم ليش.

الصور من تصويري إذا تبي أتشوفين الصورة أظغطي  هنا

يومي في جو مثلج

اليوم كان أخر يوم لأخر إمتحان والحمدلله الإمتحان كان سهل وأضن أني سويت كويس فية…وهذا من دعوات الوالدة الله يحفضها ومجهود المدرسة.
مجهود المدرسة بتقولون ليش بقول لكم عشان صارت قصة اليوم ما أدري شو أوصفة غير أني حسيت أنه رح يصير بس ما أدري شو الي ما خلاني أتصل وأتأكد.

اليوم على بالي إن الإمتحان كان الساعة 1:10 وكنت ناطرة عشان يصير الساعة 12:00 عسب أروح مكتبة المدرسة عشان أدرس. والجو اليوم مو طبيعي الثلج ينزل من الفجر وإلين ألحين ما وقف والأرض كله ثلج ولاحد تعنى وراح يجرف الثلج قدام بيته إلا جيرانا الصينين أمشي وكأني أمشي على جبل.

خلينا نرد لسالفتنا ساعة 11:30 بالظبط أحد يتصل قمت رحت عند التليفون إلا وأشوف أسم المدرسة قلت في قلبي اللهم إجعله خير إيش يبون؟ رديت وأصلاً كنت متجهزة ولابسة وكان الجاكيت والشال فوق الكرسي والأوراق مبعثرة. المهم رديت وأحد يقول “may i speak to Maryam” قلت له أنا مريم قال أوكي وينج عن الإمتحان الإمتحان بادي من نص ساعة قلت له من نص ساعة صج. قال إيه من نص ساعة ولازم تيجين ألحين قلت له أوكي خلاص دقايق ورح أجي.

لبست الجاكيت ولميت قشي من الأوراق وحطيته في الشنطة وأمي تقول إيش فيكي قلت المدرسة أتصلو والإمتحان بدا من نص ساعة. وبعدين قلت والله كنت حاسة. أتقول أوكي يالله روحي وقولي لاحول ولا قوة إلا بالله عشان يتسهل دربك قلت أوكي ومع السلامة. طلعت من البيت وأنا أمشي بسرعة وأقول ياربي متى بوصل والإمتحان بادي من نص ساعة.

مشيت وقلت لاحول ولا قوة إلا بالله و الصراحة كأني كنت أطير ماشاء الله وصلت المدرسة بسرعة يعني في العادة أوصل المدرسة من 10 لين 20 دقيقة لمن يكون الجو سيء بس اليوم أضن أني خذيت 5  أو 6  دقايق. بتقولون أبالغ بس صدقوني ما عرفت أشلون وصلت المدرسة بهالسرعة ماشاء الله.

دخلت الإمتحان والإبلة تقول وينج كنت خايفة إنك ما تجين وترسبين في الإمتحان قلت لها عبالي الإمتحان كان الساعة 1:10 قالت أوكي حصل خير وروحي قعدي وسويت الإمتحان وخلصته قبل من الطلبة الي جو قبلي.

الحمدلله….

سؤالي لكم: هل ممرتي بموقف شبيه لموقفي… شاركوه معي؟